Luksoz dhe nga pak i papërcaktuar
Nga Samsung na vjen versioni i ri i celularit luksoz për ata të cilët kanë (tepër) para: Samsung Armani 2. Kësaj radhe nuk jemi edhe aq të sigurt se saktësisht me çka (pos emrit) dallon kjo pajisje nga celularët standard të klasës së mesme.
Emërtimi i plotë i pajisjes në fakt është Samsung Armani 2 Nighte Effect, pasi që nëpër pjesët anësore të tij shndrit njëfarë shiriti i cili nuk duket edhe aq tepër luksoz – bile më mirë të themi duket shumë i thjeshtë. Nga ana e përparme, kjo është një pajisje krejtësisht standarde, derisa nga ana e prapme me një logo të madhe të Armanit jep një dozë klasi, nëse i adhuroni gjërat e tilla.
Sa u përket mundësive, ato nuk janë të këqija, por jo edhe spektakolare: lidhje EDGE/HSDPA, FM Radio, 120 MB memorie me mundësi të zgjerimit me anë të kartelës microSD, Bluetooth dhe kamerë me rezolucion prej 3.2 megapikselash.
Samsung Armani 2 Night Effect do të jetë në shitje në Evropë gjatë muajit nëntor me çmim i cili ende mbetet i panjohur.